Муфтияттан билдиришкендей, Ош шаарынан Маскат аркылуу Жиддага алгачкы каттам учурулду. Бул каттам менен умрага аттанган кыргызстандыктар жөнөп кетишти. Жакынкы Чыгыштагы кырдаалга байланыштуу убактылуу токтотулган каттамдар эми кайра жанданды.
Биринчи каттамдан кийин Ош шаарындагы «Сулайман-Тоо» борбордук мечитинде паломничествону уюштуруу боюнча кеңешме өттү. Ага муфтияттын өкүлдөрү, умра бөлүмүнүн кызматкерлери жана Ош шаары менен Ош облусунун мечиттеринин имамдары катышты.
Жыйында паломниктерди даярдоо, умраны аткаруу эрежелерин түшүндүрүү жана сапар учурундагы коопсуздукту камсыздоо маселелери талкууланды. Муфтият жарандарды аккредитацияланган туристтик компанияларга гана кайрылууга чакырды.
Каттамдардын тартиби
Ош жана Бишкек шаарларынан Сауд Арабиясына Маскат аркылуу каттамдарды SalamAir авиакомпаниясы аткарат. Оштен учактар жумасына эки жолу — дүйшөмбү жана шаршемби күндөрү учушат. Бишкектен болсо жумасына төрт жолу — шейшемби, бейшемби, жума жана ишемби күндөрү каттамдар аткарылат. Жүргүнчүлөр Жиддага да, Мединага да бара алышат.
Быйыл март айында Кыргызстан Жакынкы Чыгыштагы абалдын курчушуна байланыштуу умрага саякаттарды уюштурууга убактылуу чектөө киргизген. Туроператорлорго жана ташуучуларга кырдаал турукташканга чейин паломничество сапарларын токтотуу сунушталган болчу.
