Администрация Бишкектеги «Мадина» контейнердик базарындагы ижарачыларга соода-сатык 10-ноябрдан тарта токтотулары тууралуу эскертти. Бул тууралуу 24.kg басылмасына окурмандар жиберген билдирүүнүн сүрөтүнөн белгилүү болду. Документке ылайык, ишкерлер 20-ноябрга чейин товарларын жана материалдык баалуулуктарын алып чыгып, соода жайларын мөөрлөп бекитүүгө милдеттүү.
Билдирүүдө 10-ноябрдан тарта соода катарлары А, В, С, Д, Е, Н, «Север-Новый», «Север-1», «Север-2», мечиттин астындагы бутиктер жана «Пахта» катары келүүчүлөр үчүн толугу менен жабылары айтылат. «Жогоруда аталган аймакта соода-сатык жүргүзүү токтотулат», — деп жазылган документте.
Документтен
Жогоруда аталган аймакта соода-сатык жүргүзүү токтотулат
Базардын жабылышынын өбөлгөлөрү
Эскерте кетсек, 2026-жылдын жай айларында бийлик «Мадина» базарын жабуу жана соодагерлерди жаңы «Ала-Тоо» базарына көчүрүү чечимин жарыялаган. Бирок ишкерлер ижара акысынын жогорулугуна жана соода үчүн керектүү шарттардын жоктугуна байланыштуу каршы чыгышкан. Арыз-даттануулардан кийин мэрия эски базардын жабылышын кийинкиге калтырып, соодагерлерге кошумча убакыт берген.
Август айынын аягында «Мадинада» ири өрт чыгып, от соода контейнерлерине жайылган. Өрттү 10 өрт өчүрүүчү эсеп өчүргөн.
20-октябрда президент Садыр Жапаров жаңы жана эски базарларга барып, ишкерлер менен жолугуп, алардын даттанууларын уккан. Ал соодагерлерге көчүүгө жардам катары транспорт берүүнү жана аны 10 күндүн ичинде аяктоону тапшырган. Ошондой эле мамлекет башчысы ишкерлерди жаңы базарда алгачкы үч ай ижара акысынан бошотууну, андан кийин дагы алты ай же бир жыл минималдуу ставкаларды белгилөөнү сунуштаган.
Азыркы учурда администрация соодагерлерди расмий түрдө эскертип, белгиленген мөөнөттө товарларын алып чыгууну талап кылууда.
