Бириккен демократиялык кыймыл (БДК) 2027-жылдын 27-январына белгиленген президенттик шайлоого бирдиктүү талапкер менен катыша турганын жарыялады. Бул тууралуу кыймылдын координатору Мамбетжунус Абылов расмий билдирүү таратты.
Билдирүүдө айтылгандай, кыймыл өлкөдөгү демократиялык күчтөрдү бириктирүүнү максат кылууда. Өкүлдөрдүн пикиринде, Кыргызстан учурда маанилүү саясий тандоонун алдында турат.
Документтен
Бүгүн Кыргызстан маанилүү саясий тандоонун алдында турат. Бир колго топтолгон бийлик, мыйзам үстөмдүгүнүн алсыздашы, сөз эркиндигинин чектелиши жана саясий куугунтуктар демократиялык баалуулуктарга олуттуу коркунуч жаратууда.
Талапкерлердин алдын ала тизмеси
Бирдиктүү талапкер мамлекеттик тил боюнча тестирлөөдөн ийгиликтүү өткөн төрт өкүлдүн арасынан тандалат. Претенденттердин катарында мурдагы БШК төрагасы, өзгөчө кырдаалдар министри жана дипломат Мамбетжунус Абылов, генерал-лейтенант, УКМКнын мурдагы жетекчиси Кеңешбек Дүйшебаев, Жогорку Кеңештин экс-депутаты Бектур Асанов жана коомдук активист Перизаткан Суранова бар.
Так ким акыркы талапкер болору азырынча айтыла элек. Бул чогултулган каражаттарга жана кабыл алынган арыздарга байланыштуу болот.
Мамбетжунус Абылов, Бектур Асанов жана Кеңешбек Дүйшебаев «Кыргызтест» мамлекеттик мекемесинде мамлекеттик тил боюнча экзамен тапшырышкан. Эми алар шайлоого катышуу үчүн кайтарылбаган салым катары каражат чогултууну пландап жатышат.
Билдирүүдө ошондой эле бардык демократиялык күчтөр, саясий көз караштарына карабастан, биригүүгө чакырык ташталды. Кыймылдын максаты — эл бийлигин, мыйзам үстөмдүгүн жана адам укуктарын коргоону камсыздоо.
Шайлоонун мөөнөттөрү
- 13-ноябрь 2026-жылга чейин
Президенттикке талапкерлерди көрсөтүү аяктайт
- 27-январь 2027-жыл
Президенттик шайлоо өтөт
Эскерте кетсек, КР Шайлоо жана референдум өткөрүү боюнча борбордук комиссиясынын календардык планына ылайык, президенттикке талапкерлерди көрсөтүү 2026-жылдын 13-ноябрында аяктайт, ал эми шайлоо 2027-жылдын 27-январында өтөт.
