Исхак Масалиев Кыргыз Республикасынын президенттик кызматына талапкерлигин көрсөтүү үчүн Борбордук шайлоо комиссиясына арыз менен кайрылды. Бул тууралуу БШКнын басма сөз кызматынан кабарлашты.
Жогорку Кеңештин мурдагы депутаты мамлекет башчылыгына талапкерлигин көрсөткөн бешинчи адам болду. Талапкерлерди көрсөтүү мөөнөтү 13-ноябрда аяктайт.
Исхак Масалиевдин тажрыйбасы
Исхак Масалиев 1960-жылы Ош шаарында туулган. Ал тарыхчы жана юрист кесибинин ээси. Ар кандай жылдары Жогорку Кеңештин бир нече чакырылышынын депутаты болгон жана Кыргызстандагы коммунисттик кыймылдын белгилүү өкүлдөрүнүн бири.
2017-жылдагы президенттик шайлоодо анын талапкерлигин Кыргызстан Коммунисттик партиясы көрсөткөн.
Башка талапкерлер
Буга чейин талапкерлигин көрсөткөндөрдүн арасында ишкер Аймен Касенов, ошондой эле Азамат Эсенбеков, Сыймык Жапыкеев жана Акай Кыдыров бар. Алар дагы БШКга арыз менен кайрылышкан.
