Токмокто мурдагы ИИМдин Жол кыймылынын коопсуздугун камсыздоо башкы башкармалыгынын жетекчиси, милициянын генерал-майору Талантбек Исаев туура эмес токтотуу үчүн айыпка жыгылды. Жергиликтүү тургундар тартып алган видеодо генералдын унаасы түз эле тротуарда турганы көрүнөт.
Күбөлөрдүн айтымында, Талантбек Исаев алгач эрежени бузганын танууга аракет кылган, бирок ЖКККБ кызматкерлери менен сүйлөшкөндөн кийин алардын далилдерине кошулган. Натыйжада инспекторлор унааны токтотуу жана туруу эрежелерин бузгандыгы үчүн айып салышкан.
Башкаларга катуу талап койгон адам
Кызыгы, Талантбек Исаев өз убагында айдоочуларды жол эрежесин сактоого чакырып, туура эмес токтотууга каршы катуу чыгып келген. 2012-жылдын мартында ИИМдин Жол кыймылынын коопсуздугун камсыздоо башкы башкармалыгын жетектеп, таасирдүү бузуучулардан коркпой турганын, келишпестик болгон жерге өзү барып чечем деп убадалаган.
