«Бишкек шаардык транспорт» муниципалдык ишканасынын 2-автобазасынын башкы инженери Бакыт Табалдиев борбордогу автобус айдоочуларынын эмгек акысы боюнча маалымат берди.
Ал «Элден собол» берүүсүндө айдоочулар айына 165 саат иштеп 70–80 миң сом аларын билдирди. Анын айтымында, бул баланстык сааттарды 2/2 деген жаңы график менен да иштеп табууга болот. Бул график кызматкерлердин толук эс алышы үчүн киргизилген.
Мурда айдоочулар 3-4 күн ашыкча иштеп, 100 миң сомдон ашык табышчу.
Вести.kg маалыматы боюнча, Табалдиев чет өлкөлүк жарандарды автобус айдоочулугуна тартуу мүмкүнчүлүгүн да айткан. Бул борбордук каттамдардагы кадр тартыштыгын жоюуга жардам берет.
Айдоочу болууну каалагандарга коюлуучу негизги талаптар: D категориясындагы айдоочулук күбөлүк жана наркологиялык, психиатриялык диспансерлерде каттоодо турбоо.
