Кыргызстанда жылдар бою бүтпөй келе жаткан турак үйлөрдүн курулушун аяктоо жана үлөшчүлөрдүн укуктарын коргоо боюнча чечимдер изделе берет. Бир катар курулуш компанияларына тышкы башкаруу киргизүү, инвесторлорду тартуу жана иштерди кайра жандандыруу пландалууда. Бул тууралуу министр Нурдан Орунтаев маалымат жыйынында билдирди.
Министр «Дөөлөт Курулуш» компаниясынын долбоорлору боюнча абалга токтолду. Бул компаниядан болжол менен 3 миң адам батир сатып алган. Сөз «Кудайберген» турак конушундагы жана Шопоков шаарындагы эки объект жөнүндө болуп жатат. Алардын курулушу 2021-жылы башталган, бирок азыркыга чейин аягына чыга элек. Иштерди улантуу үчүн инвесторлор тартылып, курулушту жаңы команда жүргүзүүдө.
Орунтаевдин айтымында, курулуштун токтоп калышынын себептеринин бири – туура финансылык эсептердин жоктугу: батирлер чарчы метрине болжол менен 750 доллардан сатылган, материалдардын баасынын өсүшү жана курулуш иштеринин наркы эске алынган эмес. Эми объектилерди бүтүрүү үчүн финансылык эсептерди жана келишим шарттарын кайра карап чыгууга туура келүүдө.
Мындан тышкары, министр дагы алты көйгөйлүү объект менен иш жүргүзүлүп жатканын билдирди.
- Жибек Жолу көчөсү, 295 жана 297 даректериндеги 80 батирлүү турак үйлөр. Курулуш 2018-жылы «Эксперт Строй» компаниясы тарабынан башталган.
- Мичурин көчөсү, 121Б дарегиндеги 169 батирлүү 9 кабаттуу үй (А жана Б блоктору). Курулуш 2021-жылы «Эксперт Строй» жана «Гидротехстрой» компаниялары тарабынан башталган.
- «Кок-Жар» турак конушу, Куйручук көчөсү, 197/2 дарегиндеги 200 батирлүү 15 кабаттуу үй. Курулуштун башталган жылы көрсөтүлгөн эмес.
Бул объектилердин бардыгына тышкы башкаруу киргизүү боюнча иштер жүрүп жатат. Бул үлөшчүлөрдүн каражатын коргоого жана курулушту аягына чыгарууга жардам берет деп күтүлүүдө.
