Курулуш, архитектура жана турак жай-коммуналдык чарба министри Нурдан Орунтаев Бишкек шаарындагы Мичурин көчөсү, 121Б дарегиндеги курулушу токтоп калган көп кабаттуу турак үйдүн абалын көрүп чыгып, үлөшчүлөр менен жолугушту.
Аталган объект эки блоктон туруп, 169 батирди камтыйт. Курулуш иштери 2021-жылы «Эксперт Строй» жана «Гидротехстрой» жоопкерчилиги чектелген коомдору тарабынан башталган. Бирок компаниялардын тарабынан ар кандай себептерден улам курулуш иштери токтоп калып, үлөшчүлөр бүгүнкү күнгө чейин батирлерин ала алышпай жатышат, деп билдирет Министрлик.
Мамлекеттик колдоо сунушу
Министр жарандардын көйгөйлөрүн угуп, курулушту улантуунун мүмкүн болгон жолдорун талкуулады. Нурдан Орунтаев үлөшчүлөргө курулушту мамлекеттин колдоосу менен бүтүрүү мүмкүнчүлүгүн кароону сунуштады. Бул үчүн жарандар аталган сунушту өз ара талкуулап, бирдиктүү чечимге келиши керек. Эгерде үлөшчүлөр макул болсо, курулуш компанияларынын ишине тышкы башкаруу киргизилет.
Мамлекеттин бул демилгеси коммерциялык максатты көздөбөйт жана мамлекет мындай чечимден эч кандай пайда алууну көздөбөйт. Негизги максат — үлөшчүлөрдүн көйгөйлөрүн чечүү жана турак үйдүн курулушун бүтүрүү.
Укук коргоо органдарына материалдар жөнөтүлөт
Мындан тышкары, Министрлик курулуш компанияларынын ишиндеги мыйзам бузууларга жана үлөшчүлөрдүн алдындагы милдеттенмелердин аткарылбаган фактыларына укуктук баа берүү үчүн тиешелүү материалдарды укук коргоо органдарына жөнөтөт.
