Каржы министрлигинин маалыматы боюнча, «Кемин-Сити» шаарынын башкы планын иштеп чыгууга 13,39 млн сом бөлүндү. Бул тууралуу 30-октябрда 2026-жылга республикалык бюджеттин такталган долбооруна карата түшүндүрмө жазууда айтылат.
Каражат Чүй облусунун Кемин районунун мамлекеттик администрациясына берилет. Ал «Кемин-Сити» долбоорунун бирдиктүү заказчиги болуп саналат.
Долбоордун өбөлгөлөрү
2025-жылдын январында президент Садыр Жапаров «Кыргыз Республикасынын Чүй облусунун Кемин районунун аймагында экологиялык жактан таза «Кемин-Сити» шаарын куруу долбоорун ишке ашыруу жөнүндө» жарлыкка кол койгон. Документте Кичи-Кемин айыл аймагынын аймагында 353,3 гектар жерге курулушту баштоо тапшырылган.
2024-жылдын 21-августунда УКМК аталган 353,3 гектар жер тилкесин мамлекетке кайтарган. Ошол эле күнү президенттин басма сөз катчысы Аскат Алагозов бул аймакта ипотекалык үйлөр куруларын билдирген.
Долбоор тууралуу негизги маалымат
Эске салсак, «Кемин-Сити» — Кыргызстандагы экологиялык жактан таза шаар куруу боюнча пилоттук долбоор. Долбоордун алкагында аймакта заманбап инфраструктураны түзүү жана жарандарды турак жай менен камсыздоо каралган.
