Жети-Өгүз районундагы тоолуу өрөөндөрдүн биринде туристтер жергиликтүү тургундар менен бирге сейрек кездешүүчү илбирсти көрүп, видео тартып алышкан. Алар тарткан кадрларды Табигый ресурстар, экология жана техникалык көзөмөл министрлигинин адистерине өткөрүп беришкен.
Министрликтин маалыматы боюнча, видео авторлорунун айтымында, атчан адамдарды көргөн илбирс дароо эле карагайлуу токойдун арасына кирип кеткен. Бул учур жапайы жаныбардын адамдардан оолак болууга аракет кылганын көрсөтөт.
Кыргызстан — илбирстин негизги мекени
Кыргызстан илбирстин негизги жашоо ареалдарынын бири болуп саналат. Адистердин баамында, өлкөдө бул жырткычтын 450–550 чамалуу башы бар. 1990-жылдары саны кескин азайганына карабастан, акыркы жылдары популяция акырындык менен калыбына келип жатканы байкалууда.
Илбирс тууралуу маалымат
Илбирстин негизги жашоо аймактары Ысык-Көл жана Нарын облустарында топтолгон. Министрлик илбирс президенттин жарлыгы менен өлкөнүн улуттук символу катары таанылганын эскертти.
Бул факт сейрек кездешүүчү жырткычты коргоо жана анын санын сактоо боюнча аракеттердин маанилүүлүгүн дагы бир жолу баса белгилейт.
