Бүгүн, 3-ноябрда, президент Садыр Жапаров Талас облусунун Айтматов жана Манас райондорунун тургундары менен жолугушту. Жолугушууда Семетей айылынын тургуну өлүм күбөлүгүн алуудагы бюрократиялык тоскоолдуктар маселесин көтөрдү.
Аксакалдын айтымында, анын жубайы кант диабети менен 30 жыл ооруп, гемодиализде жүргөн. Ал 2026-жылдын 16-майында Талас облустук ооруканасында каза болгон. Бирок калкты тейлөө борборуна (ЦОН) кайрылганда ооруканадан алынган өлүм тууралуу маалымкат жараксыз деп табылып, арыз ээси сотко жөнөтүлгөн.
Натыйжада жаран өлүм фактысын сот аркылуу тастыктоо үчүн адвокат жалдап, үч күбөнү тартууга аргасыз болгон.
Ведомстволордун жооптору
Саламаттык сактоо министри Дамирбек Осмонов кырдаалга комментарий берип, медициналык мекемелер өлгөндөн кийинки эпикризди жана адамдын өлүмүн тастыктаган тиешелүү маалымкатты берерин түшүндүрдү.
Социалдык фонддун төрагасы Бактияр Алиев болсо Соцфонд менен Саламаттык сактоо министрлигинин ортосунда маалымат алмашуу системалуу түрдө жөнгө салынганын белгиледи.
Президенттин тапшырмасы
Ведомстволордун жетекчилерин уккандан кийин Садыр Жапаров Социалдык фондго, Саламаттык сактоо министрлигине жана «Тундук» мамлекеттик ишканасына биргелешкен ведомстволор аралык өз ара аракеттенүүнү жөнгө салууну жана документтерди расмийлөөдөгү санариптик жана административдик мүчүлүштүктөрдү жоюуну тапшырды.
Эскерте кетсек, бүгүн, 3-ноябрда, мамлекет башчысы Садыр Жапаров Талас облусуна болгон жумушчу сапарынын алкагында жергиликтүү тургундар менен жолугушууларды өткөрдү.
