Кыргызстандын камсыздандыруу рыногу кеңейүүдө: 2025-жылы түзүлгөн келишимдердин саны 3,3 миллиондон ашты, ал эми камсыздандыруу төгүмдөрүнүн көлөмү 10,2 млрд сомго жетти. Ошол эле учурда милдеттүү камсыздандыруу өлкөнүн турак жай фондунун үчтөн бир бөлүгүн гана камтыды. Нацстатком, Финнадзор жана Мамлекеттик камсыздандыруу уюмунун «Кабар» агенттигине берген маалыматтары рыноктун өзгөрүүсүн, айрым камсыздандыруу түрлөрү боюнча кайсы аймактар алдыда экенин жана кызматтардын жеткиликтүүлүгүн жогорулатуу чараларын көрсөтөт.
Бишкек келишимдердин саны боюнча алдыда
2025-жылы Кыргызстанда 3 млн 359,8 миң камсыздандыруу келишими түзүлдү — мурунку жылга салыштырмалуу эки эседен ашык көп. 2024-жылы бул көрсөткүч 1 млн 653,4 миң келишимди түзгөн.
Ошентип, катталган камсыздандыруу келишимдеринин негизги бөлүгү Бишкекке туура келет. Бирок алардын саны чогултулган төгүмдөрдүн же аймактардагы төлөмдөрдүн көлөмүн чагылдырбайт.
Төгүмдөр бир жылда дээрлик эки эсе өстү
Нацстаткомдун маалыматы боюнча, камсыздандыруу төгүмдөрүнүн көлөмү 2024-жылдагы 5,2 млрд сомдон 2025-жылы 10,2 млрд сомго чейин өстү. 2026-жылдын биринчи жарым жылында камсыздандыруу компаниялары 5,644 млрд сом алышты.
Төлөмдөрдүн суммасы да көбөйдү. 2024-жылы камсыздандыруучулар 782,8 млн сом төлөшсө, 2025-жылы 1,411 млрд сом төлөштү. 2026-жылдын январь–июнь айларында төлөмдөр 1,172 млрд сомду түздү.
Камсыздандыруу рыногунун негизги көрсөткүчтөрү
Түзүлгөн келишимдер боюнча жалпы камсыздандыруу суммасы да өстү: 2024-жылдагы 1,886 трлн сомдон 2025-жылы 3,470 трлн сомго чейин. 2026-жылдын биринчи жарым жылында бул көрсөткүч 2,011 трлн сомду түздү.
