Бишкек шаарынын борбордук Ала-Тоо аянтында 30-октябрда «Манас айтуу» аттуу республикалык иш-чара өтөт. Бул тууралуу уюштуруучулар билдиришти.
Иш-чара «Манас» эпосунун, улуттук салттардын жана кыргыз элинин маданий мурасынын кеңири жайылышына арналган.
Кимдер катышат?
Программага Коргоо министрлигинин Аскердик институтунун курсанттары, Улуттук гвардиянын аскер кызматкерлери, күч органдарынын өкүлдөрү, манасчылар жана акын-импровизаторлор катышат.
Иш-чара саат 16:00дө башталат.
Программада эмнелер бар?
- Кыргыз элинин Алтайдан Ала-Тоого көчүшү, Манастын төрөлүшү, хан көтөрүлүшү жана 40 жигиттин биригиши тууралуу «Манас» эпосунан үзүндүлөрдү көркөм аткаруу
- Акындардын чыгышы
- Кыргызстандын Мамлекеттик гимнин аткаруу
- Улуттук гвардиянын ардактуу кароолунун курал менен көрсөтмөлүү кайтаруусу
- Армиялык кол салмай күрөшүнүн ыкмаларын көрсөтүү
Иш-чаранын жыйынтыгында мыкты катышуучулар сыйланат.
Уюштуруучулардын айтымында, иш-чара 2024-жылдын 18-декабрындагы «Улуттук дем — дүйнөлүк бийиктик» президенттик жарлыгын ишке ашыруу алкагында өтүп жатат. Анын максаты — улуттук мурасты сактоо жана жаштар арасында патриоттуулукту тарбиялоо.
