Түп районунун Ысык-Көл айылында 100 орунга ылайыкталган бала бакчанын курулушу бүтүп калды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Долбоор республикалык бюджеттин каражатына ишке ашырылууда. Объекттин жалпы баасы 85 миллион сомду түзөт. Эки кабаттуу имараттын жалпы аянты 1 404 чарчы метр.
Бала бакча жөнүндө
Министрлик маалыматы боюнча, курулуш иштери дээрлик аяктаган. Учурда ички бөлмөлөр тазаланып, эмеректер орнотулуп, айланасы көрктөндүрүлүп жатат.
Ички бөлмөлөрдү жыйноо, эмерек орнотуу жана жанындагы аймакты көрктөндүрүү иштери жүрүп жатат.
Жаңы бала бакчада уктоочу жана оюн бөлмөлөрү, сабак өтүүчү жайлар, ашкана, врачтын кабинети жана кабылдама каралган. Айланасында балдар үчүн оюн аянтчасы да болот.
Курулуш 2024-жылдын декабрында башталган. Бул долбоор аймактагы балдардын мектепке чейинки билим алуусун жакшыртууга багытталган.
