Текстиль өнүктүрүү борборунун жетекчиси Азамат Алымкуловдун билдиришинче, 16 тигүү ишканасы чет элдик потенциалдуу сатып алуучулар менен сүйлөшүүлөрдү жүргүзүп жатат. Дагы 10 ишкана өз продукциясынын үлгүлөрүн башка өлкөлөргө жөнөткөн.
Бул жыйынтыктарга экспорттук акселератордун алкагында жетишилген, ага 31 компания катышкан. Программаны Кыргыз экспортту өнүктүрүү жана илгерилетүү борбору негизги сатуу рыногундагы — Россиядагы кырдаалга байланыштуу ишке киргизген.
Биз акселератор туура убакытта, туура саатта ишке киргизилди деп ойлойбуз. Тигүү продукциясынын негизги сатуу рыногундагы акыркы окуяларды эске алуу менен бизнес альтернативалуу рынокторду издөө жөнүндө ойлоно баштады.
Программага ири дүйнөлүк бренддер менен иштөө тажрыйбасы бар эки эл аралык эксперт катышкан. Эки ай бою ишканаларга жергиликтүү адистер да кеңеш беришкен.
Акселератордун жыйынтыгында 17 компания REX системасына катталып, бул аларга Европа Биримдигине экспорттоодо бажы жеңилдиктерине жетишүүгө мүмкүнчүлүк берет. Дагы 17 ишкана LinkedIn платформасында өздөрүнүн профилдерин түзүшкөн. Беш ишкана веб-ресурстарды түзүү процессинде.
