Бишкекте Шанхай кызматташтык уюмунун (ШОС) мүчө өлкөлөрүнүн Медиа жана аналитикалык борборлор форуму биринчи жолу өткөрүлүп жатат. Бул эл аралык иш-чарага 26 мамлекеттен 250гө жакын өкүл катышууда.
Мамлекеттик камсыздандыруу уюму форумдун расмий камсыздоочу шериги болуп, 180ден ашуун чет өлкөлүк делегатка жалпы 91 миллион сомдук камсыздандыруу полистерин берди.
МКУнун өкүлү Бактыгул Абдыжалиев кыргыз камсыздоо тармагынын эл аралык өнөктөштөр менен кызматташууга даяр экенин, бул кыргызстандык ишкерлик жана инвестициялык климатты жакшыртууга өбөлгө жаратарын белгиледи.
Форумдун темасы «ШОС жаңы доордо: түшүнүшүүдөн практикалык кызматташууга» деген ураандын негизинде өтүп, катышуучулар маалымат алмашуунун, медиа тармагындагы санариптик трансформациянын жана гуманитардык кызматташтыктын келечегин талкуулашууда.
