Бишкекте психотроптук жана наркотикалык каражаттарга кирген айрым дарыларды жеңилдетилген электрондук рецепттер менен берүүчү дарыканалардын тизмеси кеңейтилди. Бул тууралуу Милдеттүү медициналык камсыздандыруу фонду (ММКФ) билдирди.
Фонддун маалыматы боюнча, буга чейин атайын дарылар мамлекеттик «Эл Аман» дарыкана тармагы аркылуу гана берилчү. Эми аларга «Неман» жана «Медсервис Kg» жеке тармактарынын айрым филиалдары, ошондой эле «Аманбекова» жеке ишкери кошулду.
Кандай дарыканалар катышат?
Тизмеге төмөнкү дарыканалар кирди:
- ИП Аманбекова: №983 дарыкана, Новопавловка айылы, Чүй проспектиси, 279 (наркотикалык жана психотроптук каражаттар).
- «Медсервис Kg» ЖЧКсы: №8, Курманжан Датка көчөсү, 133; №20, «Ак-Ордо» жаңы конушу, Барсбек көчөсү, 1/107; №71, Дэн Сяопин проспектиси, 175; №79, Байтик Баатыр көчөсү, 1 (баары психотроптук каражаттар).
- «Неман»-3, №100, Бейшеналиева көчөсү, 19, 11-12-квартиралар; «Неман»-4, №94, Байтик Баатыр көчөсү, 57; «Неман»-8, №495, Саратовская көчөсү, 27, 1-квартира (баары психотроптук каражаттар).
Дарыларды 90%ке чейин арзандатуу менен алуу үчүн бейтаптар үй-бүлөлүк дарыгерине (ҮБК/МСБ) кайрылып, электрондук рецепт алса болот. Рецепттин жарактуулук мөөнөтү — бир ай.
Пилоттук долбоордун мааниси
1-июлдан 31-декабрга чейин Бишкекте Саламаттык сактоо министрлигинин пилоттук долбоору ишке ашырылууда. Ага ылайык, мамлекеттик кепилдиктер программасы жана ММКнын кошумча программасы боюнча жеңилдетилген рецепттер менен дарылар «Эл Аман» тармагы аркылуу гана берилчү.
