Kaktus.media редакциясына Максаттын эжеси Алтынай Толобаева кайрылып, бир тууганын ташууну уюштурууга көмөк сурады. Алтынайдын айтымында, Максат быйыл жазында акча табуу үчүн Сахалинге кеткен.
Июлдун ортосунда Максат туугандары менен байланышын үзгөн. Алтынай Бишкектен Южно-Сахалинскидеги ооруканаларга чалып, бир тууганын облустук оорукананын жандандыруу бөлүмүнөн тапкан. Ал башынан оор жаракат алып, комада жаткан.
Алтынай дароо Южно-Сахалинскиге учуп барып, Кыргызстандын Россиядагы элчилигине, бир тууганы иштеген компаниянын өкүлдөрүнө жана полицияга кайрылган.
Компаниянын айтымында, Максатты прораб кайтаруучунун кабинасында эс-учун жоготкон абалда тапкан. Полиция болсо кырсык болгонун билдирген. Элчиликтин кызматкерлери жардам берүүгө аракет кылышкан, бирок тиешелүү органдардан ушундай эле жоопторду алышкан.
Оорукананын дарыгерлери болсо жаракаттар кырсыктан эмес экенин айтышкан. Үй-бүлө бул окуянын чындыгын иликтөөнү жана Максатты Бишкекке алып келүүнү суранууда.
Максаттын абалы оор бойдон калууда. Үй-бүлөгө аны ташуу үчүн финансылык жана уюштуруу жагынан жардам керек. Каалоочулар Kaktus.media редакциясы аркылуу байланыша алышат.
