Бишкек шаарынын короолук аймактарын көрктендирүүгө республикалык бюджеттен 500 миллион сом бөлүндү, калган сумманы шаардык бийлик толуктап берет. Жалпы өлчөмдө 839 миллион сомго жакын каражат жумшалат деп билдирди Жогорку Кеңештин депутаты Дастан Бекешев.
Бул каражаттардын алкагында 12 короо аймагын жакшыртуу жана Карагачевая токоюн кайра куруу пландалууда. Токойдо жүрүү жолдорун, суу резервуарларын, спорттук аянтчаларды, эс алуу жайларын жаңылоо жана көк жашылдандыруу иштери жүргүзүлөт.
Октябрь районундагы иштер
Депутаттын өзүнүн шайлоо округу болгон Октябрь районунда үч аймакка жалпысынан 75,3 миллион сом жумшалат. Бул жерлерде жаңы жарыктандыруу, көк жашылдандыруу жана сугаруу системасын жакшыртуу иштери жүрөт:
- Тунгуч конушу, 54-үй — 24 млн сом
- Ахунбаева көчөсү, 130а жана 32а үйлөр — 30,2 млн сом
- 6-микрорайон, 1, 2, 2/1 жана 2/2 үйлөр — 21 млн сом
Башка райондордогу пландар
Шаардын башка райондорунда да белгилүү бир даректер боюнча иштер пландаштырылган:
- Ленин району (82,9 млн сом): Шота Руставели көчөсү, 95, 97, 99-үй; Чокморов көчөсү, 185-үй; Чокморов менен Уметалиев көчөлөрүнүн кесилиши
- Биринчи май району (85 млн сом): Манас авиагородок, Панфилов көчөсү, 13-үй; Скрябин көчөсү, 19-үй
- Свердлов району (65 млн сом): Аламедин-1, 30-үй; Энергетиктер шаарчасы; Восток-5, 24 жана 25-үй
