Жогорку Кенештин жыйынында «Ар кандай маселелер» деген тартиптеги бөлүмдү карап жатканда, депутаттар жарандардын кайрылууларын жана региондордогу социалдык инфраструктураны өнүктүрүү маселелерин көтөрүштү. Бул тууралуу парламенттин басма сөз кызматы билдирди.
Депутат Алтынкуль Мурзакимова «Альянс Курулуш Плюс» курулуш компаниясынын дольщиктеринин кайрылууларын айтып келди. Аталган компания жарандардын алдындагы милдеттенмелерин аткара электиги белгиленди.
Нарын облусунун алыскы бийик тоолуу аймактарынын жашоочулары үчүн климаттык шарттарды эске алуу менен, электр энергиясын керектөөдөгү чектөөлөрдү алып салуу мүмкүнчүлүгүн карап чыгууну Кубанычбек Самаков сунуштады.
Умбеталы Кыдыралиев жер амнистиясы боюнча комиссиялардын ишине, анын ичинде Балбан-Таймаш жаңы курулуштарынын жашоочуларынын кайрылууларын кароого көзөмөлдү күчөтүү зарыл экенин белгиледи. Ошондой эле ал Бишкек шаарындагы көп кабаттуу үйлөрдөгү лифттерди жаңылоо маселесин көтөрдү.
Улугбек Ормонов Чангет жана Ийри-Суу айылдарын бириктирген жолду оңдоо зарылчылыгын белгилеп, Россия тараптын колдоосу менен Узген районунда мектеп куруу пландаштырылып жатканын айтты. Бирок долбоорду ишке ашыруу үчүн канализация системасын курууга 68 миллион сом бөлүп берүү маселеси чечилиши керек.
Чолпон Эсенаманова Кара-Балтада көп профилдик оорукана куруу жана аны заманбап жабдуулар менен камсыздоо маселесин карап чыгууну сунуштады. Мындан тышкары, ал Жайыл районундагы фасоль өндүрүүчүлөрдү колдоо, анын ичинде айыл чарба продукциясын кабыл алуу пункттарын ачуу зарылчылыгын айтты.
