Эмгек, социалдык камсыздоо жана миграция министрлиги «Бала ырысы» программасынын жаңы көрсөткүчтөрүн жарыялады. 2026-жылдын ноябрь айына карата жөлөкпул алуучулардын саны 266 166 балага жетти.
Бул сумманы төлөө үчүн 328 миллион 20 миң 598 сом 44 тыйын каражат талап кылынат. Октябрь айына салыштырмалуу алуучулардын саны 13 467 балага, же 5,3% га, ал эми төлөмдөргө керектелген каражат 16,5 миллион сомго өстү.
«Бала ырысы» программасы кичинекей балдары бар үй-бүлөлөрдү социалдык колдоону бекемдөөгө багытталган.
Санариптик форматтын өсүшү
Министрликтин белгилөөсү боюнча, жөлөкпул алууга берилген арыздардын 84% «Түндүк» мобилдик тиркемеси аркылуу тапшырылган. Бул калктын санариптик мамлекеттик кызматтарга болгон суроо-талаптын жогору экенин көрсөтөт.
Жөлөкпулду алуу шарттары
Жөлөкпул төрөлгөндөн тартып үч жашка чыкканга чейинки балдарга берилет. Аны тариздөө «Түндүк» тиркемеси же министрликтин аймактык бөлүмдөрү аркылуу жүргүзүлөт. Акча алуучулардын банктык эсептерине которулуп, төлөмдөр ай сайын 1инен 10уна чейин жүргүзүлөт.
