Жашыл энергетика фонду өзүнүн административдик имаратынын чатырына капиталдык оңдоо иштери аяктагандан кийин күн панелдерин орнотууну пландап жатат. Бул тууралуу 4-ноябрда фонддун директору Эмилбек Орозбаев Биринчи радионун эфиринде билдирди.
Анын айтымында, өндүрүлгөн электр энергиясын биринчи кезекте өз муктаждыктарын камсыздоо үчүн колдонуу көздөлүүдө. Эгерде ашыкча электр энергиясы пайда болсо, фонд аны мамлекетке сатууну көздөп жатат.
Эгерде ар бир мамлекеттик мекеме өз чатырына күн панелдерин орнотуу боюнча кадам жасаса, ал өзүн электр энергиясы менен камсыздай алат. Учурда биз ушундай долбоордун үстүндө иштеп жатабыз.
Орозбаев ошондой эле Энергетика министрлигинин имаратынын чатырына күн панелдери мурунтан эле орнотулганын маалымдады.
Мындан тышкары, фонд Бишкектин башка административдик имараттарынын чатырларына күн панелдерин орнотуу боюнча долбоорду иштеп чыгууда. Бул демилге мамлекеттик мекемелердин энергетикалык көз карандысыздыгын камсыздоого багытталган.
