Иш-чара Кыргызстандын Медиа Аракеттер Платформасы (МАП) тарабынан, Бишкектеги ЕККУнун Программалык кеңсесинин каржылык колдоосу менен уюштурулду. Ага журналисттер, редакторлор, медиа эксперттер, ЖОЖ окутуучулары, мамлекеттик органдардын, жарандык коомдун жана эл аралык уюмдардын өкүлдөрү катышты.
Катышуучулар медиа чөйрөсүн жөнгө салуу мамилелерин кайра карап чыгуу зарылдыгын белгилешти. Атап айтканда, ЖМКны каттоо талаптары жана «журналист» түшүнүгүнүн аныктамасы талкууланды. Себеби азыркы медиа салттуу редакциялардан тышкары блогерлерди, подкаст авторлорун жана башка контент жаратуучуларды да камтыйт.
Расмий кайрылуулар
Форумда Жогорку Кеңештин депутаты Дастан Бекешев, Евробиримдиктин Кыргызстандагы Өкүлчүлүгүнүн министр-кеңешчиси, өнөктөштүк мамилелер бөлүмүнүн жетекчиси Йоханнес Баур, Бишкектеги ЕККУнун Программалык кеңсесинин адамдык өлчөм департаментинин башчысы Кристофер Блэр (видео байланыш аркылуу) жана МАПтын тең негиздөөчүсү Чолпон Ногойбаева куттуктоо сөздөрүн сүйлөштү.
Депутат Бекешев жасалма интеллекттин таасирине жана маалыматты керектөө ыкмаларынын өзгөрүшүнө көңүл бурду. Анын айтымында, медиа чөйрөсүн жөнгө салуу мамилелерин кайра карап чыгуу зарыл.
Чолпон Ногойбаева медианын өлкөнүн коомдук жана экономикалык жашоосундагы ролун белгилеп, ЖМКга мамлекеттик колдоону коомду өнүктүрүүгө узак мөөнөттүү инвестиция катары кароо керектигин айтты.
Форумдун жүрүшүндө катышуучулар медиа секторунун алдында турган чакырыктарды, анын ичинде экономикалык туруктуулукту жана жасалма интеллекттин таасирин талкуулашты.
