Бишкек шаарында Кыргыз Республикасынын жашыл энергетикасы боюнча форуму ачылды. Иш-чаранын алкагында кайра жаралуучу энергия булактарын автоматташтыруу боюнча инженерлердин кирешеси менен салттуу энергетика ишканаларынын кызматкерлеринин айлыгынын айырмасы талкууланды.
КРЖМУнун Илим-инновация башкармалыгынын башчысы, экономика илимдеринин доктору, профессор Наталья Бровко ачык булактардын маалыматына таянып, тармактардагы айлык акылардын көрсөткүчтөрүн атап өттү.
Профессор Бровконун айтымында, бул айырмачылык бардык ишканалар үчүн бирдей эмес болушу мүмкүн, анткени айлыкка квалификация үчүн берилген сыйлыктар да чоң таасир этет. Ошондой эле, учурда иштеп жаткан күн электр станцияларында чет элдик адистердин саны көбүрөөк экени белгиленди.
Адистердин пикири боюнча, мамлекет жергиликтүү кадрларга тажрыйбаны өткөрүп берүүнү камсыз кылышы керек. Мындан тышкары, салттуу энергетика тармагындагы жумушчуларды да жогору деңгээлде окутуу зарыл.
Автоматташтыруу процесси адамдарды жумушсуз калтырбайт, тескерисинче, иштин мазмунун өзгөртүп, квалификацияга болгон талапты жогорулатат. Учурда төмөнкү багыттар боюнча адистер эң көп суроо-талапка ээ болуп жатат:
- релелик коргоо жана автоматика
- СКАДА жана телемеханика
- күн энергиясын генерациялоо
- кубаттуулук электроникасы
- маалыматтарды диагностикалоо жана талдоо
