Борбор Азия өлкөлөрүндө электр энергиясына болгон суроо 2030-жылга чейин орточо дүйнөлүк көрсөткүчтөн бир топ жогору темп менен өсөт. Бул тууралуу Евразия өнүктүрүү банкынын (ЕАӨБ) тармактык талдоо борборунун жетекчиси Арман Ахунбаев банктын «Чексиз энергия: Борбор Азиянын энергетикалык байланышынын архитектурасы» деп аталган баяндамасынын бет ачарында билдирди.
Анын айтымында, өнөр жай, транспорт жана санарип экономикасы энергия тутумуна жүктөмдү көбөйтүп, анын түзүмүн өзгөртүүдө. Ар кандай тармактардагы долбоорлорду ишке ашыруу үчүн инвесторлор энергиянын жеткиликтүү жана туруктуу баада болушуна ишеним артышы керек.
Энергия тартыштыгы экономика үчүн тормоз болуп калбашы үчүн, жаңы заводдорго жана өсүп жаткан шаарларга кубаттуулуктарды жана тармактарды азыртан даярдоо зарыл.
Баяндамада 2035-жылга чейин 3,5 гигаватттан ашык күн жана шамал электр станциялары ишке киргизилери айтылды. Мындай көлөмдү «сиңирүү» үчүн энергия сактагычтар, генерацияны маневрлөө жана бекем мамлекеттер аралык тармактар өтө зарыл.
Энергия тармагынын абалы
Ахунбаевдин белгилешинче, энергия тармагындагы милдеттерди өз алдынча, обочолонгон улуттук моделдин алкагында чечүү өтө кымбатка турат. Ар бир өлкөгө ашыкча резервдерди курууга жана керектөөнүн эң жогорку чеги менен күрөшүүгө туура келет.
Бул бизге бир эле учурда жаңы объектилерди куруу жана базалык инфраструктураны капиталдык жаңылоо керек дегенди билдирет. Иштин макулдашылгандыгы таптакыр башка экономиканы берет.
ЕАӨБ эксперттери биргелешкен аракеттер аркылуу аймак өлкөлөрү электр энергиясынын тартыштыгын болтурбай, экономиканын туруктуу өсүшүн камсыздай аларын баса белгилешет.
