Социалдык тармактарда Маданият министрлигинин Маданият кызматкерлеринин күнүнө арналган расмий иш-чарасынан видео тарады. Сыйлоо аземинде алып баруучу филармонияны Калыя Молдобасановдун аты менен атап койгон.
Акыркы убактагы өзгөрүүлөрдүн — желектин, гимндин өзгөрүшү, Жалал-Абаддын жана Бишкектин көчөлөрүнүн аталыштарынын алмашуусунун — фонунда колдонуучулар бийлик өлкөнүн башкы концерттик мекемесинин атын чындап өзгөрттү деп ойлошуп, аткаминерлер эмне үчүн акын Токтогул Сатылгановдун элесинен баш тартканына таң калышкан.
Кийинчерээк Маданият министрлиги түшүндүрмө берип, ведомствонун кызматкери сөз сүйлөп жатып, Калыя Молдобасанов атындагы Кыргыз улуттук консерваторияны ката менен Кыргыз улуттук филармониясы деп атаганын билдирди.
Министрлик ошондой эле кызматкерге иш-чараны уюштурууда жана өткөрүүдө кызматтык милдеттерин талаптагыдай аткарбаганы үчүн тартиптик чара көрүлгөнүн кошумчалады.
- Алып баруучу Калыя Молдобасанов атындагы консерваторияны филармония деп атаган.
- Филармониянын аты өзгөргөн жок.
- Кызматкерге тартиптик чара көрүлдү.
