Ноокат районунун өзгөчө кырдаалдар бөлүмүнүн кызматкерлери мэриянын өкүлдөрү менен биргеликте автозаправка станцияларын жана базарды текшеришти. Рейддин жүрүшүндө өрт коопсуздугунун талаптары кандай сакталып жатканы каралды.
Мэриянын маалыматына ылайык, текшерүүдө бир катар бузуулар аныкталды. Алардын ичинде өрт гидранттарынын жабылып калышы, өрт өчүрүүчү техниканын өтүшүнө тоскоол болгон курулуштар, суу сактагычтарга кирүү мүмкүнчүлүгүнүн чектелгени жана электр зымдарынын талаптарга жооп бербегендиги бар.
Коркунучтуу жагдайлар өрт өчүрүүнү кечеңдетиши мүмкүн
Адистердин айтымында, мындай кырдаалдар өрттү өз убагында өчүрүүгө тоскоолдук жаратып, адамдардын өмүрүнө жана мүлкүнө коркунуч туудурушу мүмкүн. Ошондуктан АЗС ээлерине кемчиликтерди жоюу боюнча эскертүүлөр берилди.
Ошондой эле ишкерлер менен өрттүн алдын алуу, электр жабдууларын коопсуз колдонуу, өрт гидранттарына жана суу булактарына тоскоолдуксуз жетүүнү камсыздоо боюнча түшүндүрүү иштери жүргүзүлдү.
