Билим берүү министрлигинин маалыматы боюнча, ата-энелер үчүн бир нече сервистер жеткиликтүү. «Балалык» (balalyk.edu.gov.kg) системасы аркылуу баланы мектепке чейинки билим берүү уюмуна каттоо үчүн арыз берсе болот, ал эми «Мектеп» (1mektep.edu.gov.kg) платформасы аркылуу биринчи класска кабыл алууга арыз тапшырууга болот.
«Күндөлүк» (kundoluk.edu.gov.kg) системасы мугалимдерге электрондук журналдарды жүргүзүүгө, ал эми ата-энелерге балдарынын баалары жана сабакка катышуусу жөнүндө маалымат алууга мүмкүнчүлүк берет.
Окуучулар үчүн санариптик ресурстар
Окуучуларга «Окуу китеби» (kitep.edu.kg) платформасында электрондук окуу китептери жана STEM-платформасында (stem.edu.gov.kg) тиешелүү предметтер боюнча санариптик билим берүү ресурстары жеткиликтүү. Ден соолугунан мүмкүнчүлүгү чектелген балдардын жана мигранттардын балдарынын билим алуу мүмкүнчүлүктөрүн кеңейтүү үчүн «Тунгуч» (tunguch.kg) онлайн-мектеби иштейт.
Мындан тышкары, жеке менчик мектептерди лицензиялоо үчүн электрондук модул ишке киргизилди (license.edu.gov.kg).
Педагогдорду кесиптик өнүктүрүү
Педагогдордун кесиптик өнүгүүсү үчүн «Устат» (ustat.edu.gov.kg) жана «Кесип» (kesip.edu.gov.kg) платформалары иштейт. «Мугалим» (mugalim.edu.gov.kg) маалыматтык системасында педагогикалык кадрлардын улуттук резерви, бош орундар жана билим берүү уюмдарынын директорлорун тандоо модулдары түзүлгөн. Ушул эле система аркылуу мугалимдер ведомстволук сыйлыктарды ала башташты.
Санариптик билим берүү экосистемасынын платформалары
Ошондой эле бирдиктүү санариптик реестрлер өнүктүрүлүүдө, бул билим берүү тармагындагы маалыматтарды башкаруунун натыйжалуулугун жогорулатат.
