Министрлер кабинети Азия инфраструктуралык инвестициялар банкы (АӨИБ) менен түзүлгөн алкактык макулдашууну ратификациялоо боюнча мыйзам долбоорун Жогорку Кеңештин кароосуна киргизди. Документ 2026–2028-жылдарга эсептелген жана Кыргызстандын инфраструктурасын өнүктүрүүгө 500 миллион долларга чейин каражат тартууну көздөйт.
Макулдашуу 2026-жылдын 27-сентябрында Доха шаарында кол коюлган. Каржы министрлигинин негиздеме-маалымкатына ылайык, каржылоо мамлекеттик инвестициялык долбоорлорду ишке ашыруу үчүн кредит түрүндө берилет.
Кайсы долбоорлор каржыланат?
Макулдашууга тиркемеде алты артыкчылыктуу багыт көрсөтүлгөн. Эң чоң сумма — 200 миллион доллар — Камбар-Ата ГЭС-1 долбооруна бөлүнгөн. Аны каржылоо 2027–2028-жылдары бекитилиши күтүлүүдө.
Каржылоо багыттары
Жашыл жана жеткиликтүү турак-жай программасына 2027-жылы 65 миллион доллар багытталат. Ирригация системасын өнүктүрүүгө 50 миллион доллар каралган, ал да 2027-жылы тартылат.
Ошондой эле Ош—Манас автомобиль жолун реконструкциялоого 50 миллион доллар, ал эми туруктуу экономикалык өсүү, энергетикалык жана азык-түлүк коопсуздугун колдоо программасына дагы 50 миллион доллар бөлүнөт.
Өзүнчө пункт катары Ош шаарында балдар ооруканасын куруу каралган. Бул долбоорду каржылоо көлөмү азырынча аныктала элек, аны бекитүү 2028-жылы күтүлүүдө.
