Жогорку Кеңеш бир катар эл аралык макулдашууларды ратификациялоо боюнча мыйзам долбоорлорун биринчи окууда карап чыкты. Алардын ичинде Кыргыз Республикасы менен Евразия турукташтыруу жана өнүктүрүү фондунун ортосундагы «Кыргыз Республикасынын Ош облусунун айыл калктуу конуштарында суу менен камсыздоону жана санитарияны жакшыртуу» долбоорун каржылоо жөнүндө макулдашууну ратификациялоо тууралуу мыйзам долбоору да бар.
178 000 адам таза сууга жетүү мүмкүнчүлүгүн алат
Долбоор Кара-Суу жана Өзгөн райондорунун 178 миңден ашуун тургунун борборлоштурулган коопсуз таза суу менен камсыздоого жана санитардык шарттарды жакшыртууга багытталган.
Каржылоонун жалпы көлөмү 66,7 миллион долларды түзөт. Анын 60 миллион доллары ЕФСРдин насыясы катары берилет. Насыя 20 жылга, анын ичинде 8 жылдык жеңилдетилген мөөнөт менен, жылдык 1 пайыздык үстөк менен берилет.
Долбоордун көрсөткүчтөрү
Ошондой эле биринчи окууда 2014-жылдын 29-майындагы Евразия экономикалык биримдиги жөнүндө келишимге өзгөртүүлөрдү киргизүү протоколун ратификациялоо боюнча мыйзам долбоору да жактырылды. Бул өзгөртүүлөр агроөнөр жай комплекси тармагында биргелешкен кооперациялык долбоорлорду ишке ашырууда мүчө мамлекеттерге финансылык жардам көрсөтүүгө байланыштуу.
Мындан тышкары, Министрлер кабинети менен Жапония өкмөтүнүн ортосундагы ноталарды алмашууну жана Жапониянын эл аралык кызматташтык агенттиги (JICA) менен «Адам ресурстарын өнүктүрүү боюнча стипендиялык программа» долбоору боюнча гранттык макулдашууну ратификациялоо да жактырылды.
