Ысык-Көл облусунун Каракол шаарында заманбап спорттук шаарчанын курулушу уланууда. Жалпы аянты 12 гектарды түзгөн бул долбоор спорт интернатын, көп функционалдуу спорттук комплексти жана олимпиадалык бассейндерди камтыйт. Курулуш иштеринин жүрүшүн министр Нурдан Орунтаев жеринен текшерип, сапаттуу жана мөөнөтүндө бүтүрүүнү тапшырды.
Курулуш иштерине көзөмөлдүк кылуу максатында Курулуш, архитектура жана турак жай-коммуналдык чарба министри Нурдан Орунтаев Ысык-Көл облусуна болгон жумуш сапарынын алкагында объектиге барып таанышты.
Министр аткарылып жаткан иштердин сапатына өзгөчө көңүл буруп, курулуштун белгиленген мөөнөттө, бардык курулуш нормаларын жана техникалык талаптарды сактоо менен бүткөрүлүшүн талап кылды.
Учурда объектиде фундаменттерди куруу жана темир-бетон конструкцияларын даярдоо иштери активдүү жүрүп жатат. Мейманкананын фундаменттик устундарын жана ресторандын колонналарын арматуралоо улантылууда. Ошондой эле, бассейн жайгаша турган жерде жер жумуштары башталды.
Бул спорттук шаарча спортчуларды жогорку деңгээлде даярдоого, окуу-машыгуу жыйындарын өткөрүүгө жана эл аралык деңгээлдеги мелдештерди кабыл алууга кеңири шарттарды түзөт деп күтүлүүдө. Долбоор Курулуш министрлиги тарабынан мамлекеттик «Кыргызкурулуш» ишканасынын көзөмөлүндө ишке ашырылууда.
Жакшыраак сунуштарды алуу үчүн кириңиз
Азырынча комментарий жок. Биринчи болуңуз!
