Азыркы учурда логистика дүйнөдөгү эң актуалдуу көйгөйлөрдүн бири болуп саналат. Бул тууралуу “Биринчи радио” каналынын түз эфиринде экономика илимдеринин доктору, профессор Гурас Жапаров билдирди. Анын айтымында, күйүүчү-майлоочу материалдарды жеткирүү логистикасы тармагында өзгөчө татаал абал түзүлгөн.

«Логистика маселеси Кыргызстан үчүн гана эмес, ЕАЭБге мүчө бардык мамлекеттер үчүн курч бойдон калууда. Бул багытта стратегиялык чечимдерди кабыл алуу зарыл. Жакынкы аралыкта көтөрүлгөн маселелер өкмөттүк деңгээлде чечилиши керек деп эсептейм. ЕАЭБдин алкагында биздин күйүүчү май жана инвестициялар боюнча негизги соода мамилелерибиз Орусия жана Казакстан менен ишке ашат», — деди ал.
Гурас Жапаров

Эксперт белгилегендей, ЕАЭБдин алкагында тоскоолдуктарды азайтуу максатында биргелешкен иштер жүргүзүлүүдө. Бул маселелерди шарттуу түрдө үч багытка бөлүүгө болот: геосаясий, аймактык атаандаштык жана экономикалык.

«Биринчи багыт – геосаясий фактор. Азыркы учурда Орусия менен Кытай бир тараптан, ал эми Батыш өлкөлөрү экинчи тараптан белгилүү бир тирешүүнү жаратууда. Мунун фонунда күйүүчү май базарындагы кырдаал да курчуп жатат. Ошондуктан ар бир мамлекет, анын ичинде Кыргызстан да салмактуу позицияны карманышы керек», — деп кошумчалады Жапаров.
Гурас Жапаров

Ошондой эле ал Кыргызстан менен Казакстандын чек арасындагы өткөрүү пункттарында мурункудай узак тыгындар байкалбай калганын белгиледи.

Эскерте кетсек, 7-августта Чолпон-Ата шаарындагы №2 мамлекеттик резиденцияда Евразия өкмөттөр аралык кеңешинин жыйыны өткөн.