1-ноябрда Кара-Күл шаарындагы «Энергетик» Маданият үйүндө кыргыз милициясынын түзүлгөндүгүнүн 102 жылдыгына жана кесиптик майрамына арналган салтанаттуу иш-чара болуп өттү. Бул тууралуу Turmush маалымат агенттиги кабарлады.
Иш-чарага шаар мэри Азамат Турдубеков, шаардык кеңештин төрагасы Чынгыз Кимсанов, шаардык ички иштер бөлүмүнүн башчысы Нурбек Толонов, бөлүмдүн жеке курамы, милициянын ардагерлери, мекеме-ишканалардын жетекчилери жана эмгек жамааттары катышты.
Мэр милиция кызматынын маанилүүлүгүн баса белгиледи
Аземдин башында шаар мэри Азамат Турдубеков милиция кызматкерлеринин кызматынын жогорку жоопкерчилигин жана коркунучтуулугун, жарандардын укуктарын коргоодогу жана коомдук тартипти камсыз кылуудагы эмгегинин маанилүүлүгүн белгилеп, кызматкерлерди кесиптик майрамы менен куттуктады.
Коопсуздукту камсыз кылууга жана шаарды өнүктүрүүгө олуттуу салым кошкон бир катар милиция кызматкерлери жана ардагерлер шаар мэриясынын, шаардык кеңештин, облустук ички иштер башкармалыгынын жана КР Ички иштер министрлигинин Ардак грамоталары, ыраазычылык каттары, төш белгилери жана юбилейлик медалдары менен сыйланышты.
Салтанаттуу иш-чара майрамдык концерт менен уланды.
