Блогер Айтилек Орозбеков «тил патрулдары» деп аталган акцияларын кайра жандандырды. Ал өзүнүн социалдык тармактарына тиешелүү видеону жарыялады, анда борбордогу кафелердин бирине барып, менюнун кытай жана орус тилдеринде экенин сындап жатат.
Кафенин ээлери буга байланыштуу коомчулуктан колдоо сурап, өздөрүнүн социалдык баракчаларына кайрылуу жасашты. Алардын айтымында, имараттын ичинде улуттук оюу-чиймелер, Кыргызстандын желеги жана кыргыз тилиндеги меню бар, бирок бул блогерге жеткиликтүү болгон эмес.
Орозбеков мурда да ушундай «тил патрулдарын» жүргүзүп, мекемелерден кыргыз тилинде тейлөөнү талап кылып келген. Ал видеолорун YouTube каналына жарыялап турган.
2024-жылдын ноябрында блогер бийликти күч менен басып алууга чакырык тараткан деген айып менен кармалган. 2025-жылдын январында Бишкектин Биринчи Май райондук соту аны Кылмыш-жаза кодексинин 327-беренесинин 2-бөлүгүнүн 1-пункту боюнча күнөөлүү деп таап, 70 миң сом айып пул салган. Бирок Орозбеков өз күнөөсүн мойнуна алган эмес.
2025-жылы блогер «Куликовский» соода үйүнүн дүкөндөрүнүн бириндеги чуу менен даңазаланган. Ага каршы милицияга арыз түшүп, өзү мамлекеттик тилде тейлөөдөн баш тартышканын билдирген. Орозбеков үй камагына алынган.
Социалдык тармактардагы нааразычылыктардан кийин сот блогерди бошотуп, коомчулуктун бир бөлүгү «Куликовский» соода үйүнүн продукциясына бойкот жарыялаган. Кийинчерээк соода үйү менен Орозбеков тынчтык макулдашууга келишкен.
2026-жылдын 22-сентябрында Свердлов райондук соту бул иш боюнча блогерди актады.
