Бишкек шаарынын мэриясы билдиргендей, 31-октябрда борбор калаада жашылдандыруу боюнча экологиялык акция өттү. Ага мэр Айбек Джунушалиев, шаардык активисттер жана жаштар катышты.
Иманалы Айдарбеков көчөсүндөгү бульварга 64 эмен жана ясень дарагынын көчөтү тигилди. Ал эми Тоголок Молдо атындагы скверге катальпа жана ясень дарактарынын 138 көчөтү отургузулду.
Сугаруу — башкы шарт
Мэр Айбек Джунушалиев бак-дарактарды сугаруу маселесине токтолуп, президенттин тапшырмасы бар экенин эске салды.
Бир да дарак сугатсыз калбашы керек. Президенттин тапшырмасы бар: бак-дарактар сугаруу мүмкүнчүлүгү бар жерлерге гана отургузулушу керек
Ал ошондой эле Бишкекте дарактар автоматташтырылган сугаруу системасы жок же таптакыр сугаруу мүмкүнчүлүгү жок жерлерге отургузулбай турганын билдирди.
Жашоонун уланышынын символу
Тоголок Молдо атындагы сквердеги акцияга дарыгер-онкологдор, онкологиялык ооруну жеңген аялдар жана учурда дарыланып жаткан бейтаптар катышты. Бул демилге шаарды жашылдандыруу менен катар онкологиялык оорудан дарыланып жаткан адамдарга психологиялык колдоо көрсөтүүнү да көздөйт.
Иш-чараны «Өмүр үчүн бирге» коомдук бирикмеси уюштурду. Уюштуруучулар бак отургузууну жашоонун уланышынын, үмүттүн жана келечекке болгон ишенимдин символу катары белгилешти.
31-октябрда отургузулган көчөттөр
Мэр мындай демилгелер шаардын көрүнүшүн гана эмес, жашоочулардын маанайын да жакшыртарын белгилеп, бардык катышуучуларга ыраазычылык билдирди.
Документтен
Бишкекте биргелешкен экологиялык демилгелерди өткөрүү жакшы салтка айланып баратат. Шаарды өнүктүрүүгө кошкон салымыңыздар, кайдыгерсиздигиңиздер жана активдүүлүгүңүздөр үчүн ыраазычылык билдирем. Биз ар дайым сиздердин демилгелериңиздерди колдоого жана аларды ишке ашырууга көмөктөшүүгө даярбыз. Сиздердин үлгүңүздөр башка шаардыктарды да ушундай жакшы иштерге кошулууга шыктандырат деп ишенем. Биргелешкен күч-аракет менен гана биз шаарыбызды ого бетер жашыл жана ыңгайлуу кыла алабыз
