Улуттук инвестициялар агенттигинин жетекчиси Равшанбек Сабиров "Ачык кабинет: жоопкерчилик аймагы" долбоорунун алкагында Чыгыш айланма жолунун курулушу тууралуу айтып берди.

Анын айтымында, жолдун узундугу 16,5 чакырымды түзүп, төрт тилкелүү болот. Бул калаанын көчөлөрүн, айрыкча туристтик сезондо, бир топ жеңилдетүүгө мүмкүндүк берет.

81,6 миллион доллар Долбоорго тартылган инвестиция

Долбоорго болжол менен 81,6 миллион доллар инвестиция тартылган.

Жол түштүк тараптан Ысык-Көл багытына транспорт агымын багыттоого мүмкүндүк берет жана Кыргшелк айылынын жанынан чыгууну камсыздайт.

Долбоор мамлекеттик-жеке өнөктөштүктүн негизинде ишке ашырылууда, ага жергиликтүү "Тез жол" ЖЧКсы катышууда. Макулдашуунун мөөнөтү 30 жыл, мамлекет тарабынан Транспорт жана коммуникациялар министрлиги кол койгон. "Тез жол" — биздин жергиликтүү инвестор, анын акы төлөнүүчү жолдорду куруу тажрыйбасы бар. Мисалы, Өзгөн районунда айланма жолду куруп, тыгындарды бир топ азайткан.
Равшанбек Сабиров, Улуттук инвестициялар агенттигинин жетекчиси

Сабиров белгилегендей, 30 жылдык мөөнөт аяктагандан кийин компания мамлекетке курулган жолду жана бардык инфраструктураны, анын ичинде 26дан ашуун көпүрөнү, жол түйүндөрүн жана башка объектилерди өткөрүп берет. Андан кийин аларды мамлекет тейлейт.