Бүгүн, 11-ноябрда, Кыргызстандын көптөгөн аймактарында кар жаап, жаан-чачын күчөдү. Метеорологиялык шарттардын өзгөрүшүнө байланыштуу айрым жолдордо кар тазалоо жана тайгакка каршы иштер жүрөт. Буга байланыштуу бир катар ашууларда оор жүк ташуучу унаалардын өтүүсүнө убактылуу чектөө киргизилди.
Ашуулардагы кырдаал
Транспорт жана коммуникациялар министрлигинин маалыматына ылайык, Төө-Ашуу ашуусунда аба ырайынын начарлашынан улам оор жүк ташуучу унаалардын бардык түрүнө чектөө коюлду. Бул чектөө бүгүн, 11-ноябрда саат 06:00дөн тартып Сосновка постунан баштап күчүнө кирди.
Ошондой эле Суусамыр–Талас–Тараз унаа жолунун 60-чакырымындагы «Алим» токтотуучу жайынан тартып, оор жүк ташуучу унаалардын бардык түрүнө убактылуу чектөө киргизилди. Өтмөк ашуусунда да кар жаап жаткандыктан, жолдорду тазалоо иштери улантылууда, учурда каттам ачык.
Негизги автожолдордогу аба ырайы
Бишкек–Ош автожолунун 114–138 жана 198–209-чакырымдарында кар тазаланып, жолго кум-туз аралашмасы себилүүдө. Учурда бул каттам үзгүлтүксүз жүрүүдө. Ал эми Боом капчыгайында жамгыр жаап жатса да, жолдор таза жана кыймыл ачык.
Айдоочуларды аба ырайын эске алып, ылдамдыкты азайтууга, жол эрежелерин так сактоого жана убактылуу чектөөлөргө түшүнүү менен мамиле кылууга чакырабыз.
Жол кызматкерлери учурда жолдордо коопсуздукту камсыздоо жана көзөмөл жүргүзүү иштерин улантып жатышат.
