Жакынкы Чыгышта абал курчуп, Израиль менен Ирандын ортосундагы карама-каршылык тереңдеп баратат. Израилдин премьер-министри Биньямин Нетаньяху Иранга каршы жаңы сокку урууну көздөп жатканы айтылууда. Ошол эле учурда дипломатиялык аракеттер натыйжа бере элек.
Иран ядролук доктринаны өзгөртүшү мүмкүн
Ирандын Улуттук коопсуздук жогорку кеңешинин башчысы Мохсен Резаи мурунку багытты өзгөртүү талкууланып жатканын билдирди. Анын айтымында, жаңы согуш башталса, Иран ядролук доктринасын кайра карап чыгышы ыктымал. Бирок өкмөт азырынча эч кандай жаңы чечим кабыл ала элек.
Жаңы согуш башталган учурда Иран өзүнүн ядролук доктринасын кайра карап чыгышы мүмкүн. Өкмөт азырынча эч кандай жаңы чечим кабыл алган жок.
Ошол эле учурда Ирандын тышкы иштер министри Аббас Аракчи сүйлөшүүлөр азырынча жыйынтык бербегенин, каршы тарапты акыл-эстүүлүккө чакырганын айтты.
Нетаньяхуну жаңы согушка даярданууда деп шектенишет
Израилдин мурдагы премьер-министри Эхуд Барак Биньямин Нетаньяху 27-октябрдагы парламенттик шайлоодон кийин бийликти сактап калуу үчүн өлкөнү Иран менен жаңы согушка тартууга аракет кылышы мүмкүн деп эскертти.
Нетаньяху бизди согушка тартууга аракет кылып жатат. Бул кыйроого жана оор кесепеттерге алып келип, Ирандын күчөшүнө шарт түзүшү мүмкүн. Эң көп тынчсыздандырганы — мунун баары бийликти сактап калуу үчүн эле жасалышы мүмкүн.
Барак ошондой эле израилдик радиостанцияга курган маегинде акыркы бир айдан бери Иранга каршы жаңы соккулар болушу мүмкүн деп кооптонуп жатканын, бирок Тегеранга каршы дароо аскердик аракеттерди талап кылган чалгындоо маалыматтары жок экенин белгиледи.
Ал болочок чабуулдун ички саясий кесепеттери да оор болорун, жаңы аскердик конфликт өзгөчө кырдаалга, саясий процесстин бузулушуна жана улуттук биримдик өкмөтүн түзүүгө болгон басымдын күчөшүнө алып келиши мүмкүн экенин эскертти.
Израилдеги саясий белгисиздик
Израилде парламенттик шайлоодон кийин да саясий белгисиздик сакталууда. Алдын ала жыйынтыктар боюнча Нетаньяхунун блогу Кнессетте 53 орун алса, Гади Айзенкот жетектеген оппозиция 48 мандатка ээ болду. 120 орундуу парламентте өкмөт куруу үчүн 61 мандат керек, бирок эч бир блок ага жете алган жок.
Израиль парламентиндеги алдын ала жыйынтыктар
Израилдин палестиналык жарандарын көрсөткөн эки тизме жалпысынан 19 орун алды. Добуш берүүнүн акыркы жыйынтыгы 4-ноябрга чейин чыгары деп күтүлүүдө.
Жакынкы Чыгышта айыптоолор жана коркутуулар күчөгөн шартта кырдаал чыңалуу бойдон калууда. Аймактын келечеги белгисиз.
