Ысык-Көл облусунун Жети-Өгүз районунда быйылкы өрүк жыйноо сезону башталды. Жергиликтүү бийлик өкүлдөрүнүн маалыматы боюнча, райондогу өрүк бактары жыл сайын кеңейип, Орусия менен Казакстандан келген соодагерлер тарабынан чоң көлөмдө экспорттолот. Бул аймактын экономикасына олуттуу салым кошууда.
Райондун акими Эрмек Бахавадиновдун айтымында, райондогу өрүк жана алма бактарынын аянты жылдан жылга кеңейүүдө. Учурда өрүк бактары 2500 гектар аянтты ээлеп, жыл сайын 150 миң тоннага чейин түшүм чет өлкөлөргө экспорттолот.
Жаргылчак айыл өкмөтүнүн башчысы Бактияр Ургазиев өз айыл аймагында өрүктүн 6 түрү өстүрүлөрүн белгиледи. Анын айтымында, сезон башында өрүктүн баасы 70 сомдон башталса, азыр килограммы 40 сомго жакын кармалып турат. Жыл сайын алардын айыл аймагынан 7 миң тоннага чейин өрүк чет өлкөлөргө экспорттолот.
Ал эми жергиликтүү тургундар өрүктү сактоочу кампалардын жана логистикалык борборлордун көбөйүшү түшүмдү шашпай, жогору баада сатууга мүмкүндүк берет деп эсептешет.
Азырынча комментарий жок. Биринчи болуңуз!
Жакшыраак сунуштарды алуу үчүн кириңиз
