Ысык-Көл облусунун Тон районундагы Тон айылынын жээгинде майда балыктардын көп санда топтолушу катталды. Бул тууралуу Turmush басылмасы билдирди.
Ысык-Көл облустук ички иштер башкармалыгынын туристтик-экологиялык милициясынын маалыматы боюнча, 2026-жылдын 28-октябрында кызматкерлер аталган аймакта майда балыктарды видеого тартып алышкан.
Видеодо пирске жакын жерде токтотулган катердин астына камера түшүрүлгөнү көрүнөт. Кадрларда катердин түбүнүн астынан чоң балык үйүрү тартылган.
Жергиликтүүлөр мындай көрүнүштү көп байкап жатышат
Акыркы айларда Ысык-Көл облусунун тургундары жана эс алуучулар көл жээгинен майда балыктардын көптүгүн көп байкап жатышат. Мисалы, 2026-жылдын 24-апрелинде Түп районунун Кутургу айылына жакын жерде Алтынбек Рыскулбеков жээкке жакын жерде көп сандагы майда балыктарды видеого тартып алган. Ал мурда балыктын мынчалык көптүгүн көрбөгөнүн айткан.
Буга чейин Балыкчы шаарындагы пляжда да көп сандагы балык чабактары байкалганы кабарланган.
Ысык-Көлдүн жээгинде балык чабактары көп санда пайда болду. Бул жаратылыштын калыбына келишинин жана экологиялык тең салмактуулуктун сакталышынын айкын далили. Ысык-Көл — элдин байлыгы, аны сактоо — биздин жалпы милдетибиз.
Муратбек Элеманов мунун баары браконьерликке каршы күрөштүн натыйжасы деген оюн билдирди. Анын айтымында, мынчалык көп балык чабактарын жергиликтүү тургундар акыркы 40-50 жыл ичинде көрүшкөн эмес жана ушундай эле көрүнүш бүт жээк сызыгында байкалууда.
Кийинчерээк Жаратылыш ресурстары министрлигинен экологиялык жана техникалык көзөмөл кызматы бул жагдайга көңүл буруп жатканын билдиришти.
