Астанада 4-5-ноябрда киберкылмыштуулукка каршы күрөшүүгө арналган эл аралык конференция өттү. Бул тууралуу Ички иштер министрлигинен билдиришти.
Иш-чарага 27 чет мамлекеттин өкүлдөрү катышты. Кыргызстандын делегациясын ички иштер министри Улан Ниязбеков жетектеди.
Министр өз сөзүндө киберкылмыштуулук дайыма өзгөрүп, татаал уюшкан формаларга ээ болуп жатканын белгиледи.
Өзгөчө көңүл жасалма интеллект технологияларынын өнүгүшүнө байланыштуу жаңы чакырыктарга бурулду. Алдамчылыктын кеңири таралган ыкмаларына жасалма үндөр, тааныш адамдардын жана уюмдардын атынан келген билдирүүлөр, ошондой эле жалган инвестициялык сунуштар кирет.
Мындай кылмыштардын чек аралар аралык мүнөзү аларды ачууну кыйла татаалдаштырат. Кылмышкерлер чет мамлекеттерден аракет кылып, чет өлкөлүк санариптик платформаларды, үчүнчү жактардын эсептерин жана ар кандай юрисдикциялардын финансылык инструменттерин колдонушу мүмкүн.
Буга байланыштуу Улан Ниязбеков комплекстүү мамиленин зарылдыгын баса белгиледи. Ал укук бузуулардын алдын алууну, калктын санариптик сабаттуулугун жогорулатууну гана эмес, укук коргоо органдарынын, банк мекемелеринин жана байланыш операторлорунун ыкчам өз ара аракетин да камтыйт.
Мындай кылмыштарга каршы натыйжалуу күрөшүүнүн маанилүү шарты — эл аралык өнөктөштөр менен өз убагында маалымат алмашуу.
