Мамлекет башчысынын 26-октябрдагы жарлыгы менен министрлер кабинетинин төрагасы Адылбек Касымалиевге Кыргыз Республикасынын эң жогорку артыкчылык даражасы — «Эмгек Баатыры» наамы ыйгарылды. Бул наам мамлекет жана эл алдында өзгөчө эмгеги үчүн берилет.
I даражадагы «Манас» ордени менен ички иштер министри Улан Ниязбеков, президенттин иш башкармалыгынын жетекчиси Каныбек Туманбаев жана Бишкек шаарынын мэри Айбек Жунушалиев сыйланышты. Министрлер кабинетинин төрагасынын орун басары Улан Маманканов III даражадагы «Манас» орденин алат.
Сыйлыктын себеби
Сыйлыктар Шанхай кызматташтык уюмунун саммитин, Дүйнөлүк көчмөндөр оюндарын жана Эгемендүүлүк күнүнө арналган иш-чараларды уюштурууга жана өткөрүүгө кошкон олуттуу салымы үчүн, ошондой эле кесиптик ишмердүүлүктөгү чоң жетишкендиктери үчүн ыйгарылды.
Мындан тышкары, президенттин администрациясынын жана башка мамлекеттик органдардын 11 кызматкери «Даңк» ордени менен сыйланышты.
Документтен
«Эмгек Баатыры» Кыргыз Республикасынын эң жогорку артыкчылык даражасы болуп саналат жана мамлекет менен элдин алдындагы өзгөчө эмгеги үчүн ыйгарылат.
