Министрлер кабинети мамлекеттик социалдык камсыздандыруу боюнча камсыздандыруу төгүмдөрүн төлөө тартибине өзгөртүүлөрдү киргизди. Жаңы токтомго ылайык, Кытайдын айрым жарандары Кыргызстанда камсыздандыруу төгүмдөрүн төлөөдөн бошотулат.
Бул бошотуу кызматкердин Кытайдын социалдык камсыздандыруу тутумунун катышуучусу бойдон калганын тастыктаган сертификат болгон учурда гана колдонулат.
Аталган документ Кыргызстан менен Кытай өкмөттөрүнүн ортосундагы социалдык камсыздандыруу боюнча келишимди ишке ашыруу боюнча административдик макулдашуунун алкагында берилет.
Бул норма, атап айтканда, Кыргызстанга убактылуу ишке жиберилген кытай компанияларынын кызматкерлерине, айрым өз алдынча иштеген жарандарга, эл аралык жүк ташуучуларга, кытай компанияларынын филиалдарынын жана өкүлчүлүктөрүнүн кызматкерлерине, ошондой эле КЭРдин мамлекеттик кызматчыларына жайылтылат.
Кыргызстанга 24 айга чейинки мөөнөткө жиберилген кызматкерлер үчүн бул мөөнөт эки өлкөнүн компетенттүү органдарынын макулдашуусу менен 60 айга чейин узартылышы мүмкүн.
