Курулуш, архитектура жана турак-жай-коммуналдык чарба министри Нурдан Орунтаев тиешелүү буйрукка кол койду. Ага ылайык, курулуштун нөлдүк цикл этабы аяктаганга чейин курулуп жаткан объектилердеги батирлерди жана турак эмес жайларды сатууга, үлүштүк катышуу келишимдерин түзүүгө жана жарнама жайгаштырууга тыюу салынат.
Нөлдүк цикл деп фундаментти курууну жана жер астындагы курулуш иштерин толук аяктоону камтыган этап түшүнүлөт.
Застройщиктерге тыюу салынган иш-аракеттер
Буйрукка ылайык, нөлдүк цикл аяктаганга чейин застройщиктерге төмөнкүлөргө тыюу салынат:
- курулуп жаткан объектилердеги турак жана турак эмес жайларды сатуу;
- үлүштүк катышуу келишимдерин, алдын ала келишимдерди жана жарандардын жана юридикалык жактардын акча каражаттарын курулушка тартууну караган башка жарандык-укуктук бүтүмдөрдү түзүү;
- курулуш объектилеринин жарнамасын жайгаштыруу.
Көзөмөл жана чаралар
Мамлекеттик архитектура-курулуш контролу департаментине бул талаптардын бузулушун, анын ичинде мыйзамсыз жарнаманы, сатуунун башталышын жана акча каражаттарын тартууну аныктоо милдети жүктөлдү. Бузуулар аныкталган учурда ведомство өз ыйгарым укуктарынын чегинде чараларды көрөт.
Министрлик курулуш компаниялары менен түшүндүрүү иштерин жүргүзүп жатат. Уюмдардын жетекчилери жаңы талаптар менен тааныштырылып, аларды аткарбагандыгы үчүн жоопкерчилик жөнүндө эскертилди.
Буйрук сатып алуучулардын акча каражаттарын жана укуктарын коргоого, ошондой эле курулушу толук кандуу этапка жете элек объектилерге каражат салуудагы тобокелдиктерди азайтууга багытталган.
