Кыргызстандын Улуттук илимдер академиясында илимий изилдөөчү мекемелердин жана жогорку окуу жайлардын жетекчилери катышкан кеңешме болуп өттү.
Бул жыйынга министрликтин басма сөз кызматынын маалыматы боюнча илимий изилдөө институттарынын, министрликтер жана ведомстволордун жанындагы илимий мекемелердин, жогорку окуу жайлардын жана эсеп-кысап кызматкерлеринин 100дөн ашуун өкүлү онлайн жана офлайн форматта катышты.
Жыйналыштын негизги максаты - Президенттин 2026-жылдын 6-апрелиндеги №135 жарлыгынын илимий ишмердүүлүктү реформалоо жана натыйжалуулукту жогорулатуу боюнча тапшырмаларын түшүндүрүү жана талкуулоо болду.
Илим министринин орун басары Лира Сулайманова илимдин финансылык автономиясы менен байланышкан баяндама жасады. Ал жарлыктын негизги багыттары, аткаруу механизмдери жана күтүлүп жаткан өзгөрүүлөр тууралуу сөз кылды.
- Илимдин атаандаштык жөндөмдүүлүгүн жогорулатуу
- Илим, билим берүү жана өндүрүштү бириктирүүнү бекемдөө
- Илимдеги башкаруу системасын оптималдаштыруу
Жыйындын катышуучулары тапшырмалардын практикалык жүзөгө ашуусу, ошондой эле тиешелүү мыйзам актыларын жаңы талаптарга ылайык келтирүү маселелерин талкуулашты.
