Улуттук тарых музейинде «Дүйнөлүк көчмөндөр оюндарына 40 күн калды!» деген аталышта расмий салтанат болуп өттү. Анда VI Дүйнөлүк көчмөндөр оюндарынын маданий программасы коомчулукка тааныштырылды.
Иш-чарага Маданият, маалымат жана жаштар саясаты министринин биринчи орун басары Союзбек Надырбеков, oюндардын маданий программасынын башкы режиссеру Алтынбек Максутов баштаган көптөгөн өкүлдөр катышты.
Маданият программасынын негизги багыттары, өткөрүлүүчү аянтчалары жана негизги маданий иш-чаралары кеңири баяндалды. Перформанс, көргөзмө жана башка чыгармачыл оюндар дүйнөнүн 90дон ашык өлкөсүнөн келген конокторду күтүп турат.
Расмий иш-чаранын өзгөчөлүктөрүнүн бири — жалпы улуттук руханий-маданий «Биримдик кербени» демилгесине старт берүү болду. Ал 40 күн ичинде өлкөнүн бардык 40 аймагын кыдырат.
«Биримдик кербени» көчмөн цивилизациясынын баалуулуктарын, кыргыз элинин маданий мурасын жана Дүйнөлүк көчмөндөр оюндарынын рухун даңазалоого чакырат. Азыркы учурда коомчулукта күчтүү өз ара байланышты түзүү максатында уюштурулган маанилүү демилге болуп эсептелет.
Иш-чаранын символикалык бөлүгү катары «40 күн калды!» деген аталыштагы акция да өткөрүлдү. Бул иш-чара аркылуу Дүйнөлүк көчмөндөр оюндарына арналган бирдиктүү маалыматтык өнөктүк расмий түрдө ачылды.