Кыргызстанда VI Дүйнөлүк көчмөндөр оюндарынын башталышына бир айга жетпеген убакыт калды. Бул өлкөдөгү жылдын башкы спорттук иш-чарасы болуп саналат. Kaktus.media басылмасы 10-августка карата оюндар тууралуу эмне белгилүү экенин баяндайт.
“Биримдик кербени” бүткүл өлкө боюнча
“Биримдик кербени” деп аталган маданий эстафета оюндарга 40 күн калганда башталган. Бул эстафетанын жүрүшүндө Кыргызстандын бардык 40 районундагы ыйык булактардан суу чогултулат.
Атайын суу сактоочулар бул сууну алып жүрүшөт. Кербендин катышуучулары көчмөндөрдүн салттуу унааларын — ат же өгүз чегилген арабаларды, ошондой эле төөлөрдү колдонушат. Кербен Кыргызстандын жети облусун кыдырып, Балыкчы шаарында өз жолун аяктайт. Ал жерде чогултулган сууга Хан-Теңири чокусунан алынган мөңгү суусу кошулат. Жабылыш аземинде бул сууну кийинки Дүйнөлүк көчмөндөр оюндарын кабыл ала турган өлкөнүн өкүлүнө өткөрүп беришет.
Ачылыш качан жана кайда өтөт?
Ачылыш аземи 31-августта Бишкек шаарында, өлкөнүн жаңы жана эң чоң стадиону болгон “Бишкек Аренада” өтөт. Бул стадион 51 миң кишини батыра алат. Стадиондун курулушу азыркы учурда дагы уланууда. Ошондуктан, оюндардын ачылыш аземи стадиондун өзүнүн ачылышы да болуп эсептелет.
Бул иш-чарага ШКУга мүчө мамлекеттердин президенттери келет деп күтүлүүдө, анткени дал ушул учурда Шанхай кызматташтык уюмуна мүчө мамлекеттердин башчылары кеңешинин юбилейлик жыйыны өтөт.
Ачылыш аземинде эмне болот?
VI Дүйнөлүк көчмөндөр оюндарынын ачылыш аземи көз карандысыз Кыргызстандын тарыхындагы эң ири маданий иш-чаралардын бири болууга убада берет.
