Бишкек шаардык башкармалыгына жарандардан арыз келип түшкөн. Анда 12 кабаттуу турак үйдүн курулушунда турган крандагы жарнама тактасы коңшу үйдүн чатырын тешкени айтылган. Бул тууралуу Мамлекеттик архитектура-курулуш контролу департаментинин шаардык башкармалыгына жарандардан кайрылуу түшкөнүн Курулуш, архитектура жана турак жай-коммуналдык чарба министрлиги билдирди.

Адистер кайрылуунун негизинде курулуш объектисинде ыкчам текшерүү жүргүзүштү. Буга чейин да бул объектте коопсуздук талаптарын бузуу фактылары катталып, компанияга милдеттүү аткарылуучу буйруктар берилип, административдик чаралар көрүлгөн.

Кайра аныкталган бузуулар

Бирок ошол эле объекттин кранына бекитилген жарнама тактасы коңшу турак үйдүн чатырын тешип кеткени кайрадан аныкталды. Бул жагдай коңшу үйдүн тургундарынын коопсуздугуна олуттуу коркунуч жаратат.
Курулуш, архитектура жана турак жай-коммуналдык чарба министрлигинин билдирүүсүнөн

Текшерүүнүн жыйынтыгында подрядчик катары иш алып барган ОсОО «ЭДРУС» ишканасына кайрадан 200 000 сом айып салынды. Ошондой эле курулуш нормаларын жана коопсуздук талаптарын так сактоо зарылдыгы эскертилди. Объекттин заказчиги «Артвин» компаниясы экени маалымдалды.

200 000 сом кайра салынган айып

Подрядчик ОсОО «ЭДРУС» ишканасына курулуш коопсуздугун бузганы үчүн кайрадан айып салынды.