Бишкекте ички иштер министрлигинин баңгизаттарды мыйзамсыз жүгүртүүгө каршы күрөшүү кызматынын кызматкерлери интернет-дүкөндүн ишин токтотушту. Ал аркылуу бир нече жылдан бери баңгизаттар жана психотроптук заттар сатылып келген. Бул тууралуу ведомстводон билдиришти.
Шектүү адам ыкчам иш-чаралар учурунда жашыруун жерди аныктоо учурунда кармалды. Анын унаасынан ак порошок түрүндөгү зат салынган байлам табылды. Дагы бир байлам болжолдуу жашыруун жерден чыкты.
Кармалган адамдын үйүнөн өсүмдүк өстүрүү үчүн жабдуулар, ар кандай идиштердеги суюктуктар, таңгактоочу материалдар жана таразалар табылды. Укук коргоо органдары сатууга даярдалган марихуана, гашиш жана героинди алып коюшту.
Алдын ала эсептөөлөр боюнча, алынган заттардын баасы 4,5 миллион сомду түзүшү мүмкүн.
Шектүүнүн телефондорунан «А» интернет-дүкөнүнүн Telegram-профили жана башка аккаунттар табылды. Алар баңгизаттардын, психотроптук заттардын жана марихуананын уруктарынын ири партияларын сатып алууга байланыштуу болушу мүмкүн.
ИИМдин маалыматы боюнча, кармалган адам интернет-дүкөндүн уюштуруучуларынын бири. Ал аркылуу баңгизаттар Бишкекте жана Чүй облусунда таркатылып келген.
