Курулуп жаткан Чыгыш айланма жол аркылуу өтүү баасы коомчулукта талкуу жаратты. Блогер жана жарандык активист Дмитрий Лужанскийдин айтымында, бир жолу өтүүгө 500 сом суралат деген тариф өтө эле кымбат.

Өз позициясын ал социалдык тармактарда билдирип, келечектеги жолдун баасын башка акылуу жолдор менен салыштырды.

16,5 чакырымга 500 сом. Эсептеп көрдүм: бир чакырымы болжол менен 30 сом. Үзгөн айланма жолунда 15тей. Россиянын трассаларында 5–6 рубль. Менин байкоолорум боюнча, тыгын учурунда таксиде бир чакырым ушунча турат.
Жарандык активист Дмитрий Лужанский

Лужанский жаңы жолдун курулушуна жана жеке инвестиция тартууга каршы эместигин, бирок тарифтин экономикалык негиздемесин түшүндүрүү зарыл экенин баса белгиледи.

Шаарга жол керек, мен жеке инвестицияга каршы эмесмин. Бирок тариф кантип эсептелгенин жана мамлекет канча салганын түшүнгүм келет. Менин оюмча, 350 сомдон ашпоого тийиш.
Жарандык активист Дмитрий Лужанский

Эсептөөлөргө ылайык, 500 сомдук жол кире жана 16,5 чакырымдык аралык менен ар бир чакырым айдоочуга болжол менен 30,3 сомго туура келет.

Салыштыруу үчүн, 2024-жылдын декабрында ачылган Үзгөн айланма жолу аркылуу өтүү жеңил унаалар үчүн 200 сом турат. 13,5 чакырымдык аралыкта бир чакырымдын баасы болжол менен 14,8 сомду түзөт.

Ошентип, эсептелген чакырымдык баасы боюнча Бишкектин Чыгыш айланма жолу Үзгөн жолунан болжол менен эки эсе кымбат.

Лужанский сунуштаган 350 сомдук тариф бул көрсөткүчтү Үзгөн жолунун деңгээлине жакындатат. Активист тарифтин эсебин ачык жарыялоону суранат.

Чыгыш айланма жол vs Үзгөн айланма жол

500сом, Чыгыш айланма жолдун тарифи
16,5км, Чыгыш айланма жолдун узундугу
200сом, Үзгөн айланма жолунун тарифи
13,5км, Үзгөн айланма жолунун узундугу